الانتشار على السوشال ميديا بموهبة زي الكوميديا أو موهبة فنية دا شريحة خاصة. لكن فكر في جروبس زي

دا بجد http://dabegad.com          

أو أنا أصدق العلم http://ibelieveinsci.com

أو الباحثون السوريون https://syr-res.com

دول ازاي انتشروا؟ انتشروا بإنهم فهموا إن فيه ترند معين، خلق جمهوره، وهم عرفوا يتعاملوا معاه ويقدموا للجمهور دا اللي هو عايزه. سواء ترند نشر شائعات، ودا بيخلق جمهور عايز يعرف الحقيقة، أو ترند التساؤل عن دور العلم في حياتنا. ودا معناه إن فيه جمهور مهتم إنه يعرف أكتر. بالفهم دا، اتحولوا هم نفسهم لرواد أعمال في مجالهم.

الفيديو دا بيقول لك إيه هو الترند، وإيه تأثيره. لكن أهم حاجة عملية بتحل مشكلة كبيرة هو إزاي نعرفه. بخطوات بسيطة وسهلة. تنفع الناس اللي زينا من غير المتخصصين، لكنهم في الوقت نفسه محتاجين يفهموا الترند لشغلهم، أو لحياتهم وتأثيرهم في اللي حواليهم. هنا هشارك معاكم ٣ خطوات بسيطة جدا بستخدمها بستخدمها

١– متابعة السوشال ميديا: 

دي حاجة كلنا بنعملها. هنلاحظ ان الناس بتتكلم عن مواضيع معينة، او زي ما نقول “بتهري”. فهنفهم إن دا ترند. بس خلي بالك—– الترندز بتاعة السوشال ميديا دي خداعة، لأنها ترندز في دايرتك. وأحيانا بتكون ترندز موجهة من طرف منظم. اظن اننا بقينا خلاص نعرف نفرق بين الترند اللي طالع طبيعي بسبب موضوع الناس اهتمت بيه والموضوع المفتعل.

٢– جوجل ترندز:

 أهم حاجة لو الموضوع بالنسبة لك أكتر من مجرد طرح الآراء الشخصية في دائرتك. لو مثلا بتشتغل في الاعلام، او لو عندك مشروع او “خطة” لوقت أطول.

• زور الموقع www.google.com/trends

هتلاقي قائمة “dropdown list”، تقدر تعرف بيها الترند في جوجل، وفي يوتيوب. ودول أهم ترندز لعموم الجمهور.

• في القايمة دي اختار trending searches
   

  من الصفحة اللي هتفتح تقدر تختار اسم البلد اللي عايزها وتشوف الناس بتدور على إيه النهارده. أو في فترة زمنية تاني

• طيب افرض عايز تدور على موضوع معين في ذهنك وعايز تشوف الناس مهتمة بيه أد إيه. في الحالة دي ارجع لنفس القايمة واضغط على Explore

• هتعرف الناس مهتمة بالموضوع دا بالذات قد إيه، ومهتمة بإيه بالظبط فيه.

مثال: 

كتبت “نقال” واخترت الإمارات، علشان أشوف إمتى الناس بتدور على كلمة نقال في الإمارات. الصورة بينت لي برسم بياني الفترات اللي الناس بتبحث فيها عن الكلمة.

بس كمان (السطر اللي تحته خط أحمر)، عرفني إن البحث باستخدام الكلمة الإنجليزية  mobile phone نصيبها في البحث أكبر بخمسين في المية، ودا معناه إنك لو بتكتب عن النقال، واستخدمت الكلمة الإنجليزي، هيكون عندك فرصة أكبر إن الناس اللي بتبحث في الموضوع توصل لك).

جرب أكتر من كلمة في نفس الموضوع، وشوف إيه “اللفظ” اللي ليه نصيب أكبر في البحث.

٣– جوجل أوتوكومبليت

دي أسهل حاجة لو كنت عارف الموضوع اللي بتتكلم عنه. اكتب كلمة منه في مستطيل البحث في جوجل وشوفه هيكمل الجملة إزاي. 

زي الصورة دي.

دول تلات حاجات ممكن أي حد فينا يستخدمهم علشان تكون عنده فكرة عامة عن الترندز، ويقدر يفكر يستفيد منها إزاي. فيه حاجات متخصصة، لكن مدفوعة الأجر، تنفع للشركات اللي عايزة تعمل حملة تسويق أو إعلانات. زي جوجل آد وردز  https://adwords.google.com/ أو ورد ستريم http://www.wordstream.com لكن دول هنخليهم لوقت تاني لما نتكلم عن حاجات متخصصة أكتر.

ياللا:

١- ادخل جرب بنفسك ممكن إزاي تستخدم المعلومات دي

٢- لو عندك بزنس وفريق سوشال ميديا تابع معاهم بيشتغلوا إزاي وافهمه. دا هيساعدك حتى في عملية الإنتاج، لأنه بقى جزء أساسي من نجاحك، سواء كنت إعلامي أو صاحبة مشروع أو مبادرة.

٣- لو صحفي أو صحفية خلي معرفة الترند بداية الاجتماع الصباحي. ماتخليهوش مجرد قراية للترند، لأ، عود الصحفيين اللي معاك يفهموا يعني إيه ترند.

في انتظارك:

بنبتدي بموضوع يفتح الأبواب، لكن دايما فيه مجال للتوسع. لو عايز تتوسع شوف اللينكس المذكورة في الموضوع. ودي مش الطريقة الوحيدة ابعت لنا لو فيه نقطة عدت علينا، أو مكتبنهاش بطريقة واضحة. أو سؤال في ذهنك مجاوبناش عليه.

ويا سلام لو تبعت لنا بمعلومات أكتر لو عندك خبرة في المجال دا. نكون شاكرين مهللين.

سلسلة مفاتيح السوشال ميديا