مقالات هتعجبك

إزاي تحدد جمهورك وتعرف توصل له في ٥ دقايق 

في الحلقة الأولى من سلسلة مفاتيح السوشال ميديا اتكلمنا عن 

معرفة توجهات الجمهور، اللي بنسميها الترند، وعن الطرق اللي الإنترنت بتوفرهالنا علشان نعرف الترند

دي الحلقة التانية: تصنيف الجمهور والوصول إليه. شوف الفيديو

في الحلقة دي هنعرف:

١- إزاي تصنف الجمهور دا إلى شرايح، عمرية، اجتماعية، جغرافية

ليه؟

لأن كل واحدة من الشرايح دي هتحدد لك نوع الرسالة اللي هتستخدمها. الأطفال غير الشباب غير الكبار. البنات غير الولاد. اهتماماتهم مختلفة، وبالتالي الوصول إليهم مختلف

اجتماعيا: كل ما بتخاطب شريحة اجتماعية بتنوع الرسالة على حسب اهتماماتها. مخاطبة شريحة في منطقة عمالية تختلف عن مخاطبة شريحة في منطقة سياحية

وجغرافيا: رغم إن السوشال ميديا تقدر توصل لأي مكان، إلا إن الجغرافيا بتخلي اهتمامات الناس مختلفة لسبب بسيط. هو إن الأحداث عندهم مختلفة. ناس من مختلف الشرايح، لكن عايشين في بقعة جغرافية واحدة، هتلاقي اهتماماتهم متقاطعة في شوية مسائل، حدث سياسي، أو حدث طبيعي، أو طقس. أو حتى التوقيت. لو عندك منتج إعلامي (أو غيره) عايز توصل بيه للمنطقة العربية كلها مثلا، فانت بتتكلم عن أوقات مختلفة في الاطلاع على السوشال ميديا. الساعة أربعة صباحا في المغرب، والناس نايمة، بتكون تمانية في الإمارات أو قطر، والناس رايحة على شغلها. 

يبقى لازم تصنف الجمهور. تمهيدا للخطوة التالتة، إزاي تضمن تفاعل الجمهور.

٢: مافيش صيغة واحدة تضمن لك الوصول للجمهور. فيه – زي أي حاجة تاني في الدنيا – محاولة وخطأ وتصويب. 

محتاج تدرب نفسك على دا.

ممكن تمارسه من خلال شغلك، أو شغل حد قريبك، بحيث تقدر تحطه في اختبار عملي (حتى لو مكانش شغلك في مجال السوشال ميديا، لأن دا مفيد جدا)

محتاج تقيم نتيجة مجهودك

٣- فيه وسائل على الإنترنت بتساعدنا في التقييم. وبالتالي بتساعدنا في تعديل الرسالة

أبرزها 

في فيسبوك

  • Facbook Insight

screenshot.png

لو عندك صفحة على فيسبوك هتلاقي فيسبوك إنسايت جنب النوتيفيكاشن. فيها معلومات مفيدة جدا عن التفاعل مع البوستات، والكلمات المفتاحية، وعدد اللي وصل لهم البوست من أساسه.

في تويتر

ممكن تدخل عن طريق اللينك دا. أو ممكن ببساطة عن طريق بروفايلك. هتلاقي الصورة دي على يمين البروفايل، بموازاة أول تويتة. 

اضغط على الصورة هتاخدك على صفحة مفصلة أكتر فيها كل المعلومات عن اللي كتبته، وعدد اللي شافوها، واللي اتفاعلوا معاها. بجانب معلومات تاني.

عرفت مثلا إن ٥٦٪ من الفولورز عندي معاهم خط فودافون، و٣٨٪ معاهم خط موبينيل، و٣٣٪ معاهم خط اتصالات، وهكذا إلى آخر
القائمة بشركات من مصر أو خارجها (طبعا فيه ناس عندها خطين، علشان كده النسبة مش بتجمع لـ ١٠٠٪)

دي ممكن تكون معلومة مفيدة لحد عنده مشروع. أو عايز يعمل دعاية على موبايل

فيه طبعا خدمات تاني مدفوعة، دي هنسيبها لبوستات متخصصة أكتر. البوستات هنا مقصود بيها الناس اللي زيي وزيك، اللي بيشتغلوا في الإعلام، أو بيعملوا فكرة أو مبادرة أو مشروع صغير، أو عايزين ينشروا آراءهم بس بطريقة تمكنهم من انتشار أكتر.

  • للمواقع

google analytics

بيقدم لك معلومات كافية للغرض عن عدد زوار الموقع، وعن أماكنهم الجغرافية، وعن الكلمات المفتاحية اللي اهتموا بيها تقدر تبتدي منها

  

الخطوات المطلوبة منك:

لو عندك صفحة على فيسبوك روح على فيسبوك إنسايت ودور على المعلومات اللي تديلك صورة واضحة أكتر عن جمهورك. راجع البوستات، خصوصا لو كنت متوقع اهتمام أكتر ببوست ومالقيتوش.. 

لو عندك صفحة على تويتر روح على analytics.twitter.com

لو عندك ويبسايت محتاج إنك تعمل أكاونت على جوجل أناليتيكس بزيارة الصفحة دي https://analytics.google.com/analytics/web/?authuser=0#provision/SignUp/

على حسب نوع مقدم الخدمة للويبسايت الخاص بيك هتعرف نوعية الخدمات اللي ممكن الموقع يقدمهالك. (تقدر تعرف نفس المعلومة عن طريق الشركة اللي مقدمة لك الموقع زي ورد برس مثلا)

المعلومات اللي هتعرفها هتفيدك جدا. الفيديو التالت من السلسلة دي هيكون عن إزاي تخلى الجمهور يتفاعل معاك. ممكن تشوفه من هنا. هيقدم خطوات بسيطة تحسن الانتشار.

مين ممكن يستفيد من الموضوع دا

الموضوع دا مخصص للمستخدمين العاديين زيي وزيك. ودي الخطوات البسيطة اللي ممكن بيها يعرفوا جمهورهم. فيه مواقع تانية أقل شهرة وانتشارا وبتقدم نفس الخدمة. أغلبها بيكون مجاني في حدود ٣٠٠٠ زائر، وبعدين بيكون مقابل اشتراك شهري. 

لو جربت موقع تحليلي تاني، ولقيت إنه مفيد، احكي لنا عن تجربتك في التعليقات.

ولو عندك خبرة خاصة في السوشال ميديا ممكن تكتب لنا موضوع مفصل وهننشره باسمك

لو الفيديو عجبك ماتنساش اللايك والشير

 

سلسلة مفاتيح السوشال ميديا

About khaledalberry (93 Articles)

إعلامي عمل في بي بي سي ١٢ سنة، راديو وتليفزيون وديجيتال ميديا bbcarabic.com
. راسل صحفيا من ١٣ دولة. كان مديرا مناوبا لمكتب بي بي سي عربي في العراق بعد حرب العراق.
. راسل بي بي سي من حيفا وجنوب لبنان في حرب تموز /يوليو ٢٠٠٦
.شارك في تأسيس دوت مصر ورأس تحريرها
. أصدر أربعة كتب هي الدنيا أجمل من الجنة، ونيجاتيف ورقصة شرقية (القائمة القصيرة للبوكر العربية) والعهد الجديد. له كتابان قيد النشر هما “الأمية المقدسة” و “انفصام شخصية مصر”.
. حاصل على بكالوريوس الطب والجراحة من كلية الطب جامعة القاهرة

أهلا وسهلا برأيك

%d bloggers like this: