إزاي تخلي الجمهور يتفاعل معاك بخطوات بسيطة
شكرا على اللايك والشير
بعد ما شفنا في الفيديو الأول إزاي نستخدم معرفتنا بالترند لقراءة ما في عقل الجمهور، وشفنا في الفيديو التاني إزاي نحدد الجمهور ونوصل له، هنحتاج خطوة مهمة جدا علشان مجهودنا مايضيعش.
هنحتاج نضمن إن الجمهور يتفاعل معانا. دا بالظبط عامل زي البهارات في الطبخ. المجهود كله بيكون اتعمل، وخسارة تضيع المجهود بسبب عدم الاهتمام بالخطوات البسيطة دي.
الفيديو دا بيشرح الموضوع في خمس دقايق. لو كنت شفت الفيديو الأولاني أو التاني فوت المقدمة اللي بتاخد عشرين ثانية وكمل بعدها.
الفيديو الأول والتاني بيتكلموا عن حاجة محتاجة بحث على النت. علشان كده كانت المواضيع المصاحبة ليها في الويبسايت بتقدم لينكات لمواقع هتحتاجها. إنما هنا هنغير الأسلوب شوية. ونتكلم عن خطوات بسيطة تساعدك من أول ما تبتدي تجهز الموضوع إنك تجهزه بطريقة تضمن تفاعل الجمهور
١- ابدأ الموضوع من العنوان
قبل ما تعمل أي حاجة في الموضوع لازم يكون عندك عنوان عجبك. الموضوع مش في صياغة العنوان بالألفاظ. المقصود هنا هو صياغة فكرة تجذب شريحة من الجمهور وتحسسه إن فيه قيمة للي هيتقدم له
قيمة في معرفة معلومة جديدة تنفعه أو تسليه
أو في قضاء وقت ممتع لو وعدته بمادة فيها ترفيه
أو يقدم خدمة مباشرة بإنك تدله على حاجة هتوفر فلوسه (محل عامل أوكازيون مثلا، أو جهة بتقدم خدمة محتاجها، أو آب هيوفر له وقته، أو مطعم بيقدم أكل كويس، أو نوع منتجات هي الأفضل في السوق) إلخ
٢- اختار الأسلوب اللي هتقدم بيه الموضوع
هضرب لك مثال بسيط فاكره من دكتور جراحة. كان بيقول لنا إن الطريقة الوحيدة لمعرفة طريقة تنفيذ جراحة معينة هي إنك تشوفها، دي حاجة ماتتشرحش، زي ما طريقة ربط رباط الجزمة ماتتشرحش، وإلا هتحتاج كتابة طويلة جدا ومملة
بالمثل. فيه حاجات ينفع تتشرح بالكتابة، لكن فيه حاجات أحسن تتقدم كصورة، وفيه حاجات تاني الفيديو فيها هو الكنج، لأنه بيختصر مجلدات (الكلام اللي في التلات فيديوهات دول مثلا لو اتعمل كتابة هياخد مقالات، وهيبقى ممل
حدد الأسلوب اللي هتقدم بيه المادة
٣- وانت بتعمل المادة لازم تجاوب على اللي طرحته في العنوان.
العنوان دا زي الوعد. لو وعدت الناس بحاجة ومالقوهاش في المادة المقدمة هيحسوا بخيبة أمل، وإنك خدعتهم
ما ينفعش تقول عنوان جذاب زي “أسرار ما دار في الغرف المغلقة في اجتماع رجال الأعمال” وبعدين يطلع الموضوع مافيهوش أسرار ولا حاجة، وكله كلام عمومي
٤- استرجع اللي قلناه في الترند (الفيديو الأول) والتصنيف (الفيديو التاني).
ليه؟ لأنك محتاج تربط الموضوع بترند معين، وتستخدم ألفاظ متداولة في البحث. أو تعمل موضوع تكون عارف إنه بيوافق مواصفات الترند، يعني عارف إن فيه شريحة هتهتم بيه. وهنا هتستخدم التصنيف علشان تحدد الشريحة اللي مهتمة بيه إيه أحسن طريقة لمخاطبتها
وبمناسبة الترند، خلي في بالك إن الفيديو حاليا بقى عليه إقبال أكتر من الصور (ترند أكتر من الصور)، والصور أكتر من التكست
٥- التعليق.
انا وانت وغيرنا بنتبادل المعرفة. فخلي دايما مجال للتعليق والإ
ضافة والاعتراض والمناقشة من جانب الناس. فيه تويتة في الفيديو من الأستاذ نبيل الحلفاوي حلوة جدا في موضوع التفاعل مع التعليقات. أي تعليق مش سيئ
النية يستحق إنك تتعامل معاه وترد عليه
٦- الترويج
خلي في بالك إن الموضوع بيحتاج بعد ما يتعمل مجهود كبير في الترويج ليه. ماتهملوش. ابذل مجهود ووقت في عمل صورة كويسة، وفي نشره على أنواع السوشال ميديا المختلفة، وكل نوع حسب الطريقة اللي بيفضلها.
فيسبوك بيفضل الفيديوهات أكتر من اللينك.
تويتر بيفضل الفيديوهات القصيرة أو أي حاجة بتشتغل لوحدها زي الـ جيف، أو السلايد
فيه مواقع تاني ليها طبيعة مختلفة. لو بزنس عندك لنكد إن، مش علشان الانتشار، علشان التأثير، على اعتبار إن الموضوع ممكن يشوفه حد له علاقة بالشغل
فكر في وسائل السوشال ميديا المناسبة لموضوعك، وغير الوصف والصور بما يتناسب معاها
لو قضيت يوم تعمل الموضوع ويوم تشتغل على الترويج ليه، وشافوا ١٠٠ شخص، أحسن ما تعمل موضوعين في يومين ويشوفهم ٢٠ شخص بس
٧- SEO
دا معناه إنك تهتم بالتفاصيل اللي مابتظهرش للناس، الميتاداتا، والتاج، والمعلومات عن الصور
كل الحاجات دي بتأثر في محركات البحث، اللي كلها بتشتغل بآلات، بتعمل مجموعة من المواصفات تختار على أساسها المواضيع اللي بتبرزها
تابع إيه اللي اتغير في “لوغاريتمات” المواقع الشهيرة المختلفة وحاول تواكبها
٨- اسأل.
الإنترنت رائعة لأنها خلتنا نعرف نتواصل بسهولة، ونتبادل خبراتنا. البوست العربي بيرحب بأي سؤال عندك ومالقيتلوش إجابة. مش معنى كده إننا عارفين الإجابة، لأ، بس هنسأل برضه ونحاول نوفرها
أما لو عندك معلومة مفيدة فأهلا وسهلا ومرحبا. مهما كانت المعلومة صغيرة دي ممكن توفر على حد مجهود ساعة أو ساعتين بحث. استخدم التعليقات وعرفنا بيها، أو ابعت لنا واحنا نعرضها شاكرين
آخر حاجة
الفيديوهات التلاتة دي مش هتاخد من وقتك كتير. لكن على الأقل هتفتح لك أبواب في التعامل مع أهم أداة في العالم حاليا، السوشال ميديا، فشوفها وانت مستني صديق أو صديقة متأخرين عن معادهم، أو وانت في مواصلات
لو عجبتك الفيديوهات لايك وشير.. يمكن توصل لحد تاني ويستفيد منها أو توحي له بفكرة
أهلا وسهلا برأيك