استعد لإعلان وفاة الجامعة .. توقيت البداية هيفرق معاك كتير – تكست
في البداية:
انت أكيد عارف إن عهد التوظيف الحكومي انتهى.
معناه إنك داخل على سوق عمل بشروط مختلفة، مش بتعترف باللوائح والشهادات، إنما بحصيلة المهارات اللي تقدر تقدمها لشركتك.
هنا لازم نفتكر حقيقتين مهمين:
١- أهمية الجامعة زمان كانت نابعة من احتكارها للمعرفة. يعني لو عايز تتعلم أي مجال فيه مكان واحد يقدر يوفر لك المعرفة الخاصة بالمجال دا، هو الجامعة، أو المعاهد التعليمية. حاليا المعرفة متوفرة على الإنترنت. ومتوفرة في كورسات كتير.
٢- النقطة التانية دي مرتبطة بالأولى. إن الجامعة كانت المكان الموثوق الوحيد لإعطائك شهادة الاعتماد، بإنك حصلت على المعرفة في مجال معين.
بمعنى تاني. الناس اللي هتوظفك مكانش قدامهم أي دليل ممكن يعتمدوا عليه إلا اللي انت كتبته في سيرتك الذاتية. والشهادات اللي ألحقتها بيها. دلوقتي لأ. كتير من جهات العمل الخاص بتعتمد على إعطائك فرصة التجربة العملية. وبتدور وراك على مهارات شخصية تاني. مهارات انت نفسك مش حاططها في بالك. وعندهم وسيلة فعالة علشان يعرفوا المهارات الشخصية دي، هي حساباتك على السوشال ميديا.
التحول الاقتصادي الضخم هيكون هنا أضخم
آدم براون رجل أعمال أمريكي، أصدر كتاب هو الأكثر مبيعا في قائمة نيويورك تايمز و وول ستريت جورنال، الكتاب اسمه The Promise of A Pencil
وعمل مبادرة نشطة، مكان تدريس كورسات لمدة سنة، بيستقبل الطلاب، مبياخدش منهم أي فلوس، لو اشتغلوا وحصلوا على مرتب أكتر من خمسين ألف دولار في السنة بياخد منهم ١٥٪ لمدة تلات سنين. الفكرة نفذها بسبب حجم الديون الجامعية على مراته. في أمريكا، أكتر دولة متقدمة في العالم، ١٨٪ بس من طلبة الجامعة بيقدروا يخلصوها في الاربع سنين المخصصة ليهم. ٥٩٪ بيخلصوها في ست سنين. دا معناه تراكم ديون جامعية، بالإضافة للخسارة الناتجة عن التأخر في الشغل.
في كتابه، الأكثر مبيعا، بيكشف عن المهارات اللي الشركات الناجحة بقت بتدور عليها في اللي هتعينهم. وبيقسمها لنوعين أساسين. من فضلك، قبل ما تقراهم، طلع من دماغك تماما جو العمل في الشركات الحكومية، أو الشركات اللي ماشية بالبركة. إحنا هنا بنتكلم عن الناس اللي عايزة تحسن فرصتها في سوق العمل، وتلتحق بشركات ناجحة:
أولا: المهارات المباشرة
١- القدرة على الكتابة العملية
٢- القدرة على البحث على الإنترنت بما يوفر معلومات كافية عن أي موضوع.
٣- القدرة على إدارة المهام، وتحديد أولوياتها، وتحديد متطلباتها.
٤- استخدام البرامج الكمبيوترية زي إكسل (نمبرز)
٥- القدرة على صياغة فكرة أو توجه بطريقة مقنعة للآخرين
٦- أبجديات التعامل مع الكود في برامج الكمبيوتر.
٧- القدرة على التحدث أمام جمهور.
ثانيا: المهارات غير المباشرة، وهي مهارات أصعب في قياسها
١- إدارة الوقت
٢- حس المبادرة
٣- تلقي التقييم، وتوصيل التقييم للآخرين
٤- روح الفريق
٤- القدرة على حل المشاكل
٧- الاستماع النشط (أن تكون مشاركا ولا تكتفي بالسمع)
هقول لك حاجة. الإنسان أيام الجمع والالتقاط، في العصور القديمة جدا، كان مطلوب منه مهارات صعبة علشان يقدر يعيش. الإنسان لغاية دلوقتي محطوط في نفس الامتحان. الفارق بين مجتمعات ومجتمعات هو مدى جدية فكرة العمل.
اللي بيحصل في العالم ثورة ثقافية. هتقول لي طيب واحنا مالنا ومال العالم، إحنا خلينا هنا. غلطان! دا هيحصل هنا، متأخر سنة أو سنتين لكن هيحصل، وبصورة أقوى، لسبب بسيط، إن التنافس في سوق العمل هنا أكتر. فيه ناس كتير جدا بتدور على فرصة، والفرص قليلة. هيفرق جدا مع أي واحد فينا هيبدأ إمتى. مجرد إنك تبتدي بدري عن اللي حواليك، دا هيديك ميزة تنافسية.
لو عايز تكون لك فرصة:
فيه تلات خطوات
١- خليك دايما واعي بمتطلبات سوق العمل، وحاول تشوف العمل من وجهة نظر المدير اللي في شركة عايزة تكسب. لو كنت مدير هتبقى عايز موظفين عندهم مهارات إيه؟
٢- بموجب معرفتك دي احرص على تطوير نفسك مهنيا علشان تكون مميز في أكتر مجال قريب منك.
٣- انسى انت واخد شهادة إيه، واهتم بالتعرف على الجوانب الشخصية وتطويرها.
البوست العربي بيحاول يساعد في الجانب دا على قد ما يقدر
البوست العربي مبادرة شخصية بالجهود الذاتية، غرضها المساعدة في طرح مختلف جوانب الثقافة العملية. سواء المعرفة التاريخية والحالية، أو المهارات، أو الجوانب الشخصية، أو التجارب الحياتية. هتكسب، ومش ممكن تخسر أي حاجة، لو فضلت على اتصال معانا
١- خد جولة في البوست العربي
٢- سجل في القائمة البريدية. احنا مش بنعمل مواضيع كتير، يعني مش هتلاقي مننا زحمة إيميلات. كمان مش بنبيع حاجة، فمش هنزهقك بأي دعاية، إنما هتضمن إن مواضيعنا الجديدة توصلك. ممكن موضوع واحد يفتح لك أبواب مكنتش عارف بوجودها. كلنا كده في حياتنا.
٣- شاركنا بأسئلتك، وتجاربك. دا هيفيدنا جدا إننا نعرف انت مهتم بإيه أكتر من غيره، فنهتم إحنا كمان بيه، أو نقول لك بس خد بالك، فيه كذا وكذا كمان متنساهمش. يا أهلا وسهلا بجميع التعلقيات.
إحنا كمان بنكتب تكست علشان لو النت مش مخلياك تشوف الفيديو.. لكن تقدر تشوف الفيديو من هنا
عايز تشتغل؟ انسى شهادتك، وشوف الفيديو دا
أهلا وسهلا برأيك