زير في الموسكي علم وكيل توشيبا درس في التسويق .. شوف الحكاية
جالنا سؤالين عن التسويق
الأول من محامي بيقول إنه واحد من ضمن ٢٠٠ ألف محامي، ومش مقتنع إنه ياخد دراسات، يعني إيه إنه يسوق منتجه؟
التاني من صيدلي في بشتيل، منطقة شعبية في القاهرة الكبرى، بيسأل إزاي ممكن حد يسوق لصيدلية في بشتيل؟
خبير التسويق الأستاذ حاتم رأفت حكى لهم قصة سمعها من الحاج محمود العربي، وكيل توشيبا، وأحد أنجح وأهم رجال الأعمال في مصر.
الحكاية بتبدأ لما وصل على القاهرة جاي من بلده، قويسنا، علشان يشتغل في الموسكي. وإزاي إن أول حاجة لاحظها كانت إن كل تاجر تقريبا حاطط زير قدام المحل
فيه تاجر معين لفت نظره، وصمم إنه يسأله إنت بالذات حاطط الزير ليه،
هنشوف الإجابة في الفيديو، ونشوف إزاي الأستاذ حاتم رأفت استخدمها علشان يرد على السؤالين اللي بدأنا بيهم، وعلشان يوجه الرسالة لكل واحد، سواء كان محاسب أو كان صنايعي
خلوا بالكم، إحنا داخلين على مرحلة مافيهاش توظيف، فيها منافسة على شغل، والتسويق الشخصي مهم جدا جدا. مهم بأثره المباشر. لكن كمان مهم بفلسفة التفكير اللي بيزرعها في المخ.
١- شوف الحلقة في خمس دقايق
٢- فكر إزاي تطبق الطريقة دي على اللي تحت إيدك
٣- اسألنا لو فيه حاجة تحب إن إحنا نتكلم فيها على وجه الخصوص
٤- احكي لنا عن تجربتك، أو ناقشنا في اللي بنحكيه. النقاش أحسن طريقة إن احنا كمان نتعلم وناخد بالنا من حاجات في المستقبل
وماتنساش كمان تشوف الفيديو الأول للأستاذ حاتم رأفت..
الفيديو العربي بيرحب بكل مساهمة وتعليق وعرض لخبرة أو تجربة .. يا أهلا وسهلا
كلام ممتاز ومش بناخد بالنه منه كتير
مع إن الحاجات اللي بتبان بسيطة دي هي اللي بتفرق كتير