مقالات هتعجبك

افهم نفسك واللي حواليك في ٣ دقايق

بتشوف تصرفات من أصحابك مابتبقاش فاهمها، بتتعامل مع زملاء في الشغل وبتشوف ردود أفعال مابتقدرش تفسرها، حتى نفسك، أحيانا بتلاقيك بتتصرف بطريقة ماتعجبكش لما تفكر فيها، وترجع تكررها. طيب ليه؟ فيديو البوست العربي دا ممكن يساعدك تفهم الحكاية.

بتشوف تصرفات من أصحابك مابتبقاش فاهمها، بتتعامل مع زملاء في الشغل وبتشوف ردود أفعال مابتقدرش تفسرها، حتى نفسك، أحيانا بتلاقيك بتتصرف بطريقة ماتعجبكش لما تفكر فيها، وترجع تكررها. طيب ليه؟ فيديو البوست العربي دا ممكن يساعدك تفهم الحكاية. الفيديو بيقدم مدخل بسيط لتحليل الشخصية، عن طريق الإنيجرام أو أنماط الشخصية التسعة.

شوف الفيديو دا في ٣ دقايق

إيه الفايدة؟

١- هتفهم نفسك، إخواتك، زملاءك، وحتى أولادك أكتر

٢- لو بتكون تيم، في الكورة أو في الشغل، انت مش بس محتاج ناس عندها مهارات معينة، انت كمان محتاج مجموعة متجانسة من الشخصيات. 

٣- فهمك لنفسك بالذات بيخليك تطورها. في بحث عملته جامعة أمريكية على ٧٢ من كبار الإداريين ورجال الأعمال الناجحين، لقت فيه إن أكبر عامل للنجاح هو الوعي الشخصي

٤- في مجال الأعمال، الشركات لازم تولي اهتمام لشخصية أعضاء الفريق قد ما بتولي اهتمام لمهاراتهم.

ملخص لأنماط الشخصيات 

١- الإصلاحي: 

تخوفه الأساسي انه يبقي “فاسد” او شرير.

رغبته الاساسية انه يكون طيب ونزيه ومتزن.

دافعه الأساسي انه عايز يكون صح، ويكافح عشان يصلح ويحسن كل حاجة، ويفضل ثابت على مبادئه ويبرر لنفسه.

مميزاته انه منضبط وصاحب مبادئ وعادل وعنده أخلاق.

عيوبه انه عنيد وغير مرن ومتذمر وانتقامي. 

٢- الخدوم: 

تخوفه الأساسي انه يبقي غير مرغوب فيه وميستاهلش انه يتحب.

رغبته الاساسية انه يكون محبوب.

دافعه الاساسي انه عايز يتحب ويعبر عن مشاعره للي حواليه، وان الناس تحتاجله وتقدّره، وتتجاوب معاه.

مميزاته انه متعاطف وحنون ومعطاء وبيحس باحتياجات الناس.

عيوبه انه متلاعب وبيحب الامتلاك ومتملق ومتكبر.

٣- المنجز:

تخوفه الأساسي انه يبقي مالوش لازمة.

ورغبته الاساسية انه يحس ان له قيمة واهمية كبيرة. 

دافعه الأساسي انه عايز يثبت نفسه ويتميّز عن كل الناس، ويكون مثير للانتباه والإعجاب.

مميزاته الأساسية انه عملي ومبدع وكفؤ وبيركز على هدفه.

عيوبه انه حريص ودفاعي ومغرور وبينكر غلطاته.

٤- المتفرد:

تخوفه الأساسي انه يكون بلا هويّة أو مميزات شخصية.

رغبته الأساسية انه “يلاقي نفسه” او يخلق لنفسه هويّة متفردة.

دافعه الأساسي انه يعبر عن نفسه وعن تفرده، وانه يبقى محاط بكل حاجة جميلة ويحافظ على صورته الذهنية عن نفسه.

مميزاته انه بيعتز بالجمال ويقدره وحساس ومعبر ومبدع.

عيوبه انه بيحب “جلد الذات” وكئيب ومش عملي ويائس.

٥- المفكر: 

تخوفه الأساسي انه يكون مش قد المسؤولية ومش مفيد. 

رغبته الأساسية انه يكون منافس قوي ويكون كفؤ.

دافعه الأساسي انه عايز يعرف اكتر ويفهم بيئته المحيطة عشان يعرف يحمي نفسه منها.

مميزاته انه مطلع ومدرك ولطيف وحكيم وأصيل.

عيوبه انه غريب الأطوار ومتشائم ونفور ومتوحد.

٦- الموالي: 

تخوفه الأساسي انه يفقد الدعم و التوجيه.

رغبته الأساسية انه يحس بالامان والدعم.

دافعه الأساسي انه يلاقي الأمان واليقين. ويختبر سلوك الآخرين تجاهه، ويقاوم القلق والإحساس بالخطر.

مميزاته انه بيدعم السلطة ومتحمل للمسؤولية وجدير بالثقة ووفي.

عيوبه انه منقاد ومتناقض ومتردد ومراوغ.

٧- المتحمس:

تخوفه الأساسي من الحرمان والألم.

رغبته الأساسية انه يحس بالرضا وانه يلبي كل احتياجاته.

دافعه الأساسي انه يحافظ على حريته وسعادته، ويتجنب الإحساس بالفقدان، ويخلي نفسه دايما متحمس ومشغول.

مميزاته انه تلقائي وحماسي ومتعدد المواهب ومسلّي ومرح.

عيوبه انه مادي وسطحي وبيخاف من العمق ومتهرب ومتمرد.

٨- المتحدي:

تخوفه الأساسي انه يتأذي او ان حد يسيطر عليه.

رغبته الأساسية انه يحمي نفسه ويسيطر على حياته ومصيره.

دافعه الأساسي انه يعتمد على نفسه ويثبت قوته ويكون مهم في عالمه ويسيطر على موقفه.

مميزاته انه واثق من نفسه وملهم وقوي وقيادي وعنده كاريزما.

عيوبه انه متسلط ومخيف ومبالغ وحاد وسريع الانفعال.

٩- مشيع السلام: 

تخوفه الأساسي انه يحس بالخسارة والفراق.

رغبته الاساسية انه يحس بالسلام النفسي.

دافعه الأساسي انه يخلق الانسجام حواليه، ويتجنب الصراعات والتوتر، ويتقبل الحاجة زي ما هيّ، ويتجنب أي حاجة ممكن تضايقه او تزعجه.

مميزاته انه داعم ومتقبل وغير مدّعي وصبور.

عيوبه انه كسول وعنيد وغير متجاوب وسلبي ومنعزل.

خلي بالك

مافيش في الشخصيات دي كويس وسيئ. إنما فيه في كل الشخصيات نطاق صحي، ونطاق عادي، ونطاق غير صحي. في كل شخصية منهم. يعني تلاتة من نفس نمط الشخصية ممكن يكون حد فيهم في النطاق الصحي، مفيد لنفسه واللي حواليه، وزي الفل. ويمكن يكون في النطاق العادي، أو في النطاق غير الصحي.

كمان كل نمط بيمد أجنحة على الأنماط التانية. فتلاقي شخصية من النمط ٧ مثلا، بس مادة أجنحة على ٣ أو ٥ أو غيرها. 

نفس نمط الشخصية ممكن تتقلب ما بين الحالة الصحية الجيدة اللي بتكون عادة فيها وبين الحالة غير الصحية، في ظروف معينة، والعكس.

كل شخصية من دول عبارة عن دايرة فيها مزايا وعيوب، وليها ردود أفعال على حسب “الوتر” اللي تلمسه فيها.

لو حابب تعرف أكتر

دا لينك البحث باللغة الإنجليزية

http://www.marketwired.com/press-release/leaders-with-strong-soft-skills-get-better-business-results-than-those-who-drive-hard-1316267.htm

تجربتك بتضيف للمعرفة

الشخصيات مش علب، دي تجارب إنسانية مبنية على قصص زي اللي احنا بنعيشها. قول لنا تجربتك في الشغل أو في أي محيط اجتماعي تاني. عن ملاحظاتك لسلوك الناس من حواليك، وإيه اللي طلعت بيه من التجربة. دا هيفيدنا كتير. 

About khaledalberry (93 Articles)

إعلامي عمل في بي بي سي ١٢ سنة، راديو وتليفزيون وديجيتال ميديا bbcarabic.com
. راسل صحفيا من ١٣ دولة. كان مديرا مناوبا لمكتب بي بي سي عربي في العراق بعد حرب العراق.
. راسل بي بي سي من حيفا وجنوب لبنان في حرب تموز /يوليو ٢٠٠٦
.شارك في تأسيس دوت مصر ورأس تحريرها
. أصدر أربعة كتب هي الدنيا أجمل من الجنة، ونيجاتيف ورقصة شرقية (القائمة القصيرة للبوكر العربية) والعهد الجديد. له كتابان قيد النشر هما “الأمية المقدسة” و “انفصام شخصية مصر”.
. حاصل على بكالوريوس الطب والجراحة من كلية الطب جامعة القاهرة

2 Comments on افهم نفسك واللي حواليك في ٣ دقايق

  1. Yasmine Magdy // 11/05/2017 at 11:40 pm // Reply

    اتابع اغلب كتاباتك اول ما ألاقي اسمك أبدا اقرأ وانا متاكدة من الاستفادة من اول سطر الموضوعات جميلة لكن اعتقد انها عايزة تتوسع علشان الاستفادة تكون اكتر يعني بدل ما تنزل كل يوم مقال واحد أو فيديو واحد ( بس الخوف انك تخلي حد غيرك يكتب اكيد المحتوى هيضعف)

    • الموقع بيعتمد على الفيديو المكثف. وبنهتم فيها بالجودة اكتر من الكمية. يعني بنختار موضوع ونحاول بقدر الإمكان نقدمه بطريقة مبسطة لكن مركزة. دا بيستلزم وقت مش قليل للموضوع الواحد. وشكرا على ثقتك

أهلا وسهلا برأيك

%d bloggers like this: