مقالات هتعجبك

البوست العربي: رواد الأعمال غيروا التاريخ ونسيوا يسجلوا أفكارهم

أكتر ناس غيرت الدنيا من حوالينا هم الناس اللي فكرت، وغامرت بفلوسها ووقتها علشان تنفذ أفكارها. الناس دول هم رواد الفكر الحقيقيين، والمناضلين اللي محدش واخد باله منهم. على مدار التاريخ مافيش تغير حصل إلا لأن ناس شجعان زي دول خاضوا تجارب جديدة، وفتحوا أبواب جديدة، نتج عنها طرق جديدة في الإدارة، وفي العلم، وفي السلطة، وفي الفن

ونتج عنها مهارات متراكمة

وبعدين فيه ناس جت شافت التغيير دا، وحللته في كتب، أو نقدته، والفكرة ارتبطت بيهم… اللي نفذوها من العدم مكانوش بيكتبوا كتب، وبالتالي محدش عرف بدورهم

المجتمع اللي بيحتفي برواد الأعمال دول مجتمع ناجح، هيطلع لقدام لأنه عارف إن دا الطريق الوحيد لتنمية الموارد، ودعم الاستقلال المادي للأفراد والمجموعات

دا بيبدأ من الاستقلال والثقة بالنفس اللي تخلي إنسان يمشي ورا مواهبه 

والعكس صحيح

بالمعرفة المتراكمة فيه إنسان كان جده بياكل لحوم نية، وهو اكتشف إزاي يتحكم في النار، وفضل يراكم المعرفة لحد ما طلع القمر. نفس المسافة دي قطعها في حاجات كتير غير العلم التجريب، في الاقتصاد، في السياسة، وفي الإدارة، 

لكن إيه هي المعرفة المتراكمة دي. هي مجموعة من المهارات الصغيرة جدا، أحجار عملت بناء عظيم

في البوست العربي بنركز على المهارات العملية والشخصية اللي تساعدنا على إدارة وقتنا، وبالتالي عمرنا، بشكل أفضل

لو صلحت جهاز في بيتك وعرفتني إزاي عملت كده هتبقى وفرت لي فلوس، ووفرت لي وقت

لو مريت بتجربة شخصية وطلعت منها بخبرة، وشاركتها معايا، ممكن توفر لي سنين، وممكن تكون خبرتك دي الفاصل بين نجاحي وكبوتي

بس دايما، دايما، كل خبرة عظيمة، مجموعة من خبرات صغيرة

هنشارك معاكم الخبرات الصغيرة. مش على طريقة كتاب القراءة والمحفوظات، ولا الخطابة والوعظ، إنما بفيديوهات سريعة وبسيطة

هنشارك معاكم يعني كلنا. 

احنا اتعلمنا نعمل فيديوهات، هنستغلها في نشر الخبرات اللي نعرفها، بس هنستغلها كمان في نشر إجابات على أسئلتكم. دا من ناحيتنا

في نفس الوقت بنرحب بأي حد يبعت لنا فيديوهات ننشرها، عن مهارات وأفكار وخبرات، مهما كانت بسيطة

وبنرحب بأي فكرة حلوة صاحبها عايز يشوفها في فيديو، علشان يبقى أسهل إن عدد أكبر من الناس يشوفوها. هنحول له الفكرة لفيديو

 البوست العربي ماشي بشعارين هتلاقوهم بالتبادل

البوست العربي.. حياتك مشروع

ودا معناه إنك تحاول تديرها إدارة ناجحة، مهنيا وشخصيا، وهنتعاون كلنا مع بعض على كده 

البوست العربي.. قد وقتك

لأن الوقت مجرد كلمة تاني مرادفة للعمر.. العمر مجموعة من الأوقات المتراكمة برضو. فاحنا مش هنضيع وقتكم، هنقدم فيديوهات سريعة وفي الموضوع

يا أهلا وسهلا 💪

About khaledalberry (93 Articles)

إعلامي عمل في بي بي سي ١٢ سنة، راديو وتليفزيون وديجيتال ميديا bbcarabic.com
. راسل صحفيا من ١٣ دولة. كان مديرا مناوبا لمكتب بي بي سي عربي في العراق بعد حرب العراق.
. راسل بي بي سي من حيفا وجنوب لبنان في حرب تموز /يوليو ٢٠٠٦
.شارك في تأسيس دوت مصر ورأس تحريرها
. أصدر أربعة كتب هي الدنيا أجمل من الجنة، ونيجاتيف ورقصة شرقية (القائمة القصيرة للبوكر العربية) والعهد الجديد. له كتابان قيد النشر هما “الأمية المقدسة” و “انفصام شخصية مصر”.
. حاصل على بكالوريوس الطب والجراحة من كلية الطب جامعة القاهرة

2 Comments on البوست العربي: رواد الأعمال غيروا التاريخ ونسيوا يسجلوا أفكارهم

  1. محمود القصاص // 02/05/2017 at 4:51 pm // Reply

    دة نوع من انواع التنمية البشرية؟

أهلا وسهلا برأيك

%d bloggers like this: