نصيحة عبد الوهاب المسيري: كل دقيقة بتكسبك شهور
شكرا على اللايك والشير
التقيت بالدكتور عبد الوهاب المسيري قبل وفاته بسنوات، لإجراء حوار حول العالمانية. أثناء الحوار أهداني الدكتور نصيحة فادتني جدا في حياتي وكان لها أثر كبير. جمال النصيحة دي في بساطتها، وإن أي حد ممكن ينفذها، وفي الأثر الضخم اللي بتعمله في إنتاجية الفرد لما يلتزم بيها
اتكلمت عن النصيحة في الفيديو القصيردا. مدته ٣ دقايق.
أكبر عائق كان بيواجه دكتور المسيري في تدوين الأفكار هو إنها بتيجي أحيانا في أوقات مش مناسبة، مافيش جنبه ورقة وقلم يكتب بيهم. لدرجة إنه كان محتفظ بعدد من علب الكبريت كاتب عليها الأفكار دي. اتخيل إزاي تقدر تحتفظ بعلب كبريت وتنظمها لغاية ما تنقل من عليها الأفكار. دا حتى الورق الصغير بيضيع، وهو نفسه صعب تنظيمه
لكنه كان بيصر على إن دي أهم حاجة لرفع إنتاجية أي شخص. كان بيقول إن الأفكار بتيجي في لحظات بيسميها اللحظات الإشراقية. يعني لحظة لمع فيها عقلك بفكرة معينة صعب إنك تسترجعها بنفس الطريقة لو مدونتهاش مباشرة
علشان كده كانت نصيحته: لازم تدون الأفكار بمجرد وصولها، فين ما كنت، الفكرة اللي بتلمع في ذهنك مش هتيجي تاني بنفس اللمعان. ماتأجلهاش
إحنا حاليا مشكلتنا مع التدوين أقل كتير. لا مضطرين ندور على ورقة وقلم ولا نحتفظ بعلب كبريت، ولا أوراق مناديل، كتبناها عليها. بقى عندنا موبايل فون
على أي موبايل فون فيه آب مجاني تقدر تكتب فيه الفكرة أول ما تجي لك
لو مش عايز تكتب، بقى ممكن تسجل الفكرة بالصوت، كأنك بتبعت رسالة على واتس آب، وأول ما ترجع تسمعها، وتضيف عليها، أو ترتبها في مخك.
أكبر ميزة في التسجيل بالصوت إن الفكرة بتبقى مخلوطة بمشاعرك، وبتطلع بتلقائية، على عكس ما بيحصل لو دورت على ورقة وقلم وكتبت. فيه فاصل زمني بين سرعة الكتابة وسرعة الفكرة (الكتابة أبطأ طبعا). الفاصل دا بيقل جدا لو سجلتها
غير إن التسجيل الصوتي بيحتفظ للفكرة بالمشاعر اللي جت بيها، ودا عنصر بيختفي لما تدون على الورق. المشاعر ونبرة الصوت مهمة لأنها بتخلي العقل يفتكر السياق اللي جات فيه الفكرة. دا غير الفايدة الأكبر في التسجيل، وهي إنك بتقدر تقول كمية معلومات أكبر وتوصف مكان وأجواء ماشي فيها
الميزة التانية في الآبس إنك مابقتش محتاج تنقل الملاحظات اللي كتبتها من جهاز لجهاز. المعلومات بتتنقل بين الأجهزة، ودا بيوفر وقت كبير جدا، وبيخليك قادر تشوف الملاحظات والأفكار اللي دونتها أو سجلتها بالصوت في أي مكان
مقدرش أقول إني خبير في أنواع الآبس اللي بتسجل. إنما استخدمت ِ
Apple Noe
ودي بتيجي مجانا مع أي جهاز أبل أو آيفون أو آي باد
وبعتمد اعتماد كبير على
Evernote
إيفرنوت فيها نسخة مجانية، وهي كافية للاستخدام العادي، وممكن لو لقيت نفسك محتاج تستخدمها في قيادة فريق عمل فتطورها للنسخة المدفوعة. الحقيقة إن إيفرنوت مش بس كويسة، دي بتساعد جدا في الإنتاجية وفي تنظيم الملفات، لو انت بتنتج شغل يومي بس في نفس الوقت محتاج تتابع آخرين
فيه كمان
OneNote
دي من مايكروسوفت. أنا مستخدمتهاش لكن الريفيوز عنها كويسة
والريفيوز كويسة كمان عن
Wunderlist
https://www.wunderlist.com/home
وإن كانت “وندرليست” مفكرة للمهمات، وقوائم الحاجات اللي لازم تنفذها في مدى زمني معين
لو عندك مهارات وحاسس انك مش متقدر، اقرا عن الخمس مهارات اللي انت محتاجهم غير إجادة العمل من هنا.
أهلا وسهلا برأيك